ცხოველების ფერმა როგორც მდგომარეობა

ცხოველების ფერმა” მდგომარეობაა. შენ ჯერ ვერ ხვდები სად ხარ, პროპაგანდა კი მუშაობს და ცხოვრება მშვენიერი გგონია. პრინციპებს გიცვლიან, ღირსებას გილახავენ და მაინც კმაყოფილი ხარ.

წიგნის მოქმედება ფერმაში ვითარდება, საიდანაც ცხოველებმა მათი პატრონი ჯოუნსი გააგდეს და თავისუფალი ცხოვრება დაიწყეს. ცხოველებმა ჩამოაყალიბეს მიმდინარეობა ენიმალიზმი, შეთანხმდნენ პრინციპებზე, შექმნეს 7 მცნება, მათ შორის “ყველა ცხოველი თანასწორია”. თუმცა აღფრთოვანებამ ცოტა ხანს გასტანა, რადგან როცა რევოლუციის ერთ-ერთი შემოქმედი (ღორი სნოუბოლი) გააძევეს და მისი ადგილი მისმა კონკურენტმა (ღორმა ნაპოლეონმა) დაიკავა, მნიშვნელოვანმა პრობლემებმა იჩინა თავი.

დისკუსია უნდა გაუქმდეს..

“ნაპოლეონი ყოველთვის მართალია!” საგულისხმოა, რომ ახალი ლიდერის მიზნებს და ნებას სხვები ახმოვანებენ:

„სიმამაცე არ კმარა, – სთქვა სქუილერმა, – მთავარია ერთგულება და მორჩილება. ერთი მცდარი ნაბიჯი და დამარცხებულები ვართ. ბოლოს და ბოლოს, ამხანაგებო, გვინდა ჯოუნსის დაბრუნება?“ ამ არგუმენტის საწინააღმდეგოდ რაიმეს წამოყენება შეუძლებელია… ცხადია ცხოველებს არ სურთ ჯოუნსის დაბრუნება. ბოქსერი კი ამასობაში აზრს ასე აყალიბებს: „თუ ამხანაგი ნაპოლეონი ამას ამბობს, ეს უთუოდ სწორი უნდა იყოს“. „ნაპოლეონი ყოველთვის მართალია“.

ალეგორიები ხომ არ გეცნობათ?

ჯოუნსის სახით უზენაესი საფრთხე იქმნება, დებატები საჭირო აღარაა, რადგან ერთადერთი ვისაც საფრთხის თავიდან აცილება შეუძლია ნაპოლეონია – შესაბამისად ყველა აზრი და ძალისხმევა უზენაეს საფრთხესთან ბრძოლის მიზანს უნდა დაექვემდებაროს. შეიძლება ჯერჯერობით საწინააღმდეგო არგუმენტი მიზანშეწონილადაც კი გეჩვენება, მაგრამ საფრთხე რომელიც შექმნეს გაიძულებს გონება დაიხშო. ჩუმდები. სხვებსაც აჩუმებ!

დებატების აღსადგენად მხოლოდ საფრთხის გაქრობაა საჭირო, მაგრამ ნაპოლეონს არ აწყობს. ეს ტოტალიტარის ოცნებას ჰგავს. ძალაუფლება მისია, დამნაშავე სხვაა და ყველა პასუხისმგებლობა ამ სხვას უნდა დაეკისროს – საფრთხე რეალური უნდა ჩანდეს. მიუხედავად იმისა, რომ პირობები უარესდება ნაპოლეონი ირწმუნება, რომ ჯოუნსის დროსთან შედარებით უკეთესი დროა.

საკუთარ პრინციპებზე უარის თქმა ღირსებას გაკარგვინებს. თანდათან უტოპია უფრო მჩაგვრელ რეჟიმად იქცევა, ვიდრე წინა იყო. მცნებები რომლისაც გწამდა ახლით იცვლება „ყველა ცხოველი თანასწორია, მაგრამ ზოგიერთი უფრო თანასწორია“. თუმცა შენ ეს აღარ გადარდებს და შეიძლება ეთანხმებოდე კიდეც. თუ არ იფიქრე, თუ არ დაინახე და არ იაზროვნე, დროთა განმავლობაში იფიტები, იჯერებ, ეჩვევი. ზოგჯერ გეშინია კიდეც, ვინც აპროტესტებს იმას ხომ სჯიან. ისევ ჩუმად ხარ.

ცხოველების ფერმა მდგომარეობაა, მას ფერმიდან გაქცევით ვერ უშველი. “კრავთა დუმილი” მხოლოდ ანალიზით მიიღწევა.

“ცხოველების ფერმა” არის ტოტალიტარიზმის შესახებ შექმნილი უკვდავი შედევრი, რომელიც გვახსენებს, რომ თავისუფლება სიმართლის დანახვასა და მასთან თანაცხოვრებაშია. წიგნი გვასწავლის, რომ რაც უნდა მაცდური იყოს კომფორტული სიცრუე, სჯობს ყველაფერს თავისი სახელი დავარქვათ, რადგან სწორედ ამაშია თავისუფლებისა და ადამიანური ღირსების არსი.

ავტორი: თემო ბერიშვილი